ليه البنوك المصرية بدأت ترفع عوائد الشهادات من جديد؟ وهل المنافسة على مدخرات المصريين وصلت لمرحلة إن البنك مستعد يدفع عائد أعلى علشان يجذب السيولة؟ وهل اللي بيحصل ده معناه إن الفائدة ممكن تتحرك في اتجاه مختلف رغم تثبيت البنك المركزي لأسعارها؟
اللي بيحصل حاليا هو منافسة قوية بين البنوك على أموال العملاء.. خصوصا مع زيادة احتياجات البنوك للسيولة ورغبتها في تكوين قاعدة ودائع أكبر تقدر من خلالها تمول التوسع في الإقراض.
وبحسب بيانات البنك المركزي.. مدخرات الأفراد بالجنيه زادت بحوالي 739 مليار جنيه خلال أول 8 شهور من السنة.. ووصل إجماليها لنحو 8.5 تريليون جنيه بنهاية أغسطس.. وكان نصيب الشهادات والودائع لأجل حوالي 7.8 تريليون جنيه.
وده بيشرح ليه بعض البنوك بدأت تعيد تسعير منتجاتها الادخارية.. فمثلا بنك saib رفع عائد شهادة Excellence الثلاثية إلى 18.25% عند صرف العائد نصف سنوي.. بينما طرح بنك ABC شهادة جديدة بعائد ثابت 18% يصرف شهريا.
وكمان بنوك تانية زي العربي الأفريقي وبنك القاهرة رفعت عوائد بعض الشهادات لمستويات وصلت إلى 19% و19.5% على التوالي.. بينما تحركت بنوك أخرى بعوائد مرتفعة وفقا لاحتياجاتها من السيولة.
لكن المهم هنا إن رفع العائد مش معناه بالضرورة إن البنك المركزي غير اتجاهه.. لأن كل بنك بيحدد أسعار منتجاته وفقا لتكلفة الأموال وحجم السيولة عنده واحتياجاته للتمويل وحجم الطلب على القروض.
بمعنى أبسط.. البنك اللي محتاج سيولة وعايز يتوسع في الإقراض ممكن يقدم عائد أعلى علشان يجذب ودائع جديدة.. بينما البنك اللي عنده سيولة كافية مش هيكون محتاج يدخل بنفس القوة في سباق العوائد.
والنتيجة إن المنافسة على مدخرات المصريين ممكن تستمر حتى مع ثبات أسعار الفائدة الأساسية.. خصوصا مع توقعات بعودة بعض الضغوط التضخمية خلال الفترة المقبلة.
التعليقات